ILOILO CITY – Nadakpan sa drug buy-bust operation sang Regional Drug Enforcement Unit (RDEU) si anay Punong Barangay Noemi Hablo sang Desamparados, Jaro, Iloilo City.
Nakuha sa iya paghinakop ang ginabanta 10 ka gramo sang shabu nga nagabalor sang ginabanta P100,000.
Suno kay Senior Insp. Kenneth Bermejo, pinuno sang RDEU, gilayon nila ginpalibot ang ila mga assets sang makabati sang impormasyon nga may supplier sang iligal nga druga nga ginatago ang drugs sa ginabaligya nga isda kag diri natumod nila ang anay punong barangay sa talipapa nga ginabaligyaan sini sa Ungka 2, Pavia, Iloilo.
Nakatransaksiyon nila ang punong barangay kahapon sang aga suno kay Bermejo kag sang hapon ila gilayon nga gin-operate.
Nakuha sa paghinakop ni Hablo ang duha ka bulto sang druga, tatlo ka magagmay nga sachet sang suspected shabu kag buy-bust money nga P3,500.
Gindakop man ang kabulig ni Hablo nga si Anton Guirhen, 30 anyos sang Desamparados, Jaro tungod sang pagpakighimbon sa anay punong barangay.