ILOILO CITY – Mas matinlo pa ang bubon kun ikumpara sa nagagwa nga tubig sa tubo sang Metro Pacific Iloilo Water.
Sa interview sang Bombo Radyo kay former Environmental Management Bureau Region VI director Ariel Gloria kag residente sang D.B. Ledesma St., Jaro, Iloilo City, iya ginpahayag nga apat na ka adlaw nga wala sila nagagamit sang tubig nga gina-distribute sang Metro Pacific Iloilo Water bangud tuman ka baho kag malubog.
Suno pa sa iya, wala nila ginagamit ang tubig mangin sa pagpanghugas bangud nga ginakabalak-an nila nga magadugang ang higko sa baylo nga makuha.
Pahayag dugang sang natungdan, wala man sang may naga-tsekyar nga personnel sang nasambit nga water distribution facility agud nga magpamangkot sang kalidad sang tubig nga nagatubod sa ila gripo.
Nagalaum ang natungdan nga masolbar ini sang Metro Pacific Iloilo Water ilabi na nga nagapadayon ang ila nga pagbayad apisar nga wala sila nagagamit.
