ILOILO CITY – Hingyuon ni anay Iloilo Fifth District Rep. Niel Tupas Jr. sa Sandiganbayan nga ibalik sa preliminary investigation ang iya kaso.
May kaangtanan ini sa kaso nga graft kag malversation of public funds nga ginpasaka sang Ombudsman batok sa anay mamalidha bangud sa ginapahayag maanomalya nga paggamit sang P4.85 million nga pork barrel fund sini.
Sa interview sang Bombo Radyo Iloilo, ginpahayag ni Tupas nga iya hingyuon sa anti-graft court nga ibalik sa prelimainary investigation ang kaso bangud wala siya ginhatagan sang kahigayunan sang Ombudsman nga magsabat.
Ginpanindugan sang anay House Justice Committee chairman nga wala siya sang nabaton nga notice gikan sa Ombudsman nga gina-hearing na ang kaso.
Ginkuwestyon naman ni Tupas ang kaso sang Ombudsman bangud suno sa anay mamalidha, siya ang nagreklamo sa Commission on Audit (COA) angot sa pagpeke sang iya pirma agud ma-release ang pondo gikan sa iya PDAF.
Ang pondo ginapahayag nga ginhatag ni Tupas sa Kalusugang Alay sa Masa Foundation Inc. para sa livelihood projects sa Iloilo Fifth District apang wala mag-agi sa public bidding.
Suno sa Ombudsman, indi accredited ang amo nga NGO para magpatuman sang proyekto.
Samtang posible suno kay anay Rep. Tupas nga bangud miyembro siya sang Liberal Party sadtu, rason nga gina-ipit siya.