Former San Dionisio Mayor Peter Paul Lopez (blue) and Mayor Larry Villanueva (white)
SAN DIONISIO, ILOILO – Ginapausisa ni anay San Dionisio Mayor Peter Paul Lopez ang ginapahayag tuman ka damu nga job hire sang Local Government Unit sang San Dionisio, Iloilo nga ginagamit sa pagpangampanya sang mga kandidato para sa May 13 Midterm Elections.
Sa interview sang Bombo Radyo kay Lopez, iya ginpahayag nga santo sa iya nakita nga mga laragway sa social media kag sa iya mismo nasaksihan, ang mga job hire sang ila banwa ang nagapakigbahin sa pagpangampanya.
Sa pagkamatuod suno kay Lopez, indi man makita ang madamu nga mga job hire nga nagatrabaho sa palibot sang banwa kag sa baylo, makita lamang sila sa tion nga inughatag na sang sweldo.
Santo sa iya ihibalo, ang mga job hire ang ginbaton umpisa sang Enero tubtub Marso subong nga tuig.
Bangud sini, iya na nga ginpadal-an sang sulat si Mayor Larry Villanueva lakip na ang Commission on Elections (COMELEC) kag ang Civil Service Commission (CSC) agud nga magpatigayon sang imbestigasyon tuhoy diri.
Samtang, suno naman kay Mayor Villanueva sa interview sang Bombo Radyo, ang mga ginatumod ni Lopez nga mga job hire ang boluntaryo nga nagresign agud nga makabulig sa pagpangampanya sa mga pulitiko bilang utang nga kabalaslan.
Sa pihik sini, ginpromisa ni Villanueva nga hatagan si Lopez sang detalye tuhoy sa mga job hire sang San Dionisio agud nga mahibaluan kun bala ang mga nakita nga nagapangampanya amo ang existing job hire sang banwa.
