Ginpaathag ni former Vice President Leni Robredo nga gin-abi-abi niya kag ginkamusta si President Ferdinand Marcos, Jr. sang nag-abot ini sa Sorsogon City sang damlag lang bangud ginatahod niya ang posisyon sini.
Pahayag pa sang anay bise-presidente, sang ginhagad siya ni Senate President Chiz Escudero nga maghulat kay Marcos, wala gid siya nagpang-duha-duha bangud “bisita” nila ini sa Bicol region.
”Sa akin kasi hindi naman isyu ‘yun, in fact para sa akin ‘yung nagbibigay respeto ka sa posisyon, so wala namang… walang pagaatubili ‘yung pag-oo ko kay Senator Chiz kung puwedeng sumama ko sa kanyang pagsalubong,” suno kay Robredo.
”Tingin ko tama lang naman kasi bisita natin sa Bicol Region, ‘yun na nga ang problema nga di ako naka-stay nang matagal kasi may hinahabol ako,” dugang sang former official.
Natabo ini sa inagurasyon sang Sorsogon Sports Arena sang nagligad nga Martes kun sa diin personal nga nagtambong si Marcos.
Isa si Robredo sa former kag current government officials nga nagtindog, naghulat, kag nagtamyaw kay Marcos sang nagsulod ini sa arena sa Barangay Balogo, Sorsogon City sang alas dies sang aga.
Una naman nga nagpasalamat si Marcos kay Escudero sa iya tikang nga makaangkon sila ni Robredo sang bisan malip-ot lamang nga pagbugnuhanay. Wala man nakatinir si Robredo sa programa sa Sorsogon bangud may naka-schedule ini nga kaladtuan sa Naga.
Ginakabig ini sang iban nga tikang sa “political reconciliation” ilabi na bangud ang duha ang matunog nga nagsumpunganay sa 2022 elections sa pagka-presidente.
Sang 2022, nagpadalagan si Marcos sa idalom sang ticket nga UNITEAM kaupod si Vice President Sara Duterte. Nabugras na ini nga alyansa subong kun sa diin ginsiling ni Sara nga indi man sila mag-abyanay nga duha.
Matandaan nga si Sara ang nagbisita man mismo sa balay ni Robredo sang Peñafrancia Festival sang nagligad nga Septyembre, apang ginsiling ni Leni nga “personal” kag indi “political” ang ila mga naistoryahan.#
