Posible nga masuspinde sa masunod nga semana ang excise tax sa LPG kag kerosene kag magapadayon ini tubtob katapusan sang tuig, kon aprubahan ni Presidente Ferdinand Marcos Jr.
Ang Development Budget Coordination Committee (DBCC) ang nagrekomendar nga suspindihon anay ang excise tax sa LPG kag kerosene kag ini ang ginpirmahan man ni Finance Secretary Frederick Go kag ipadala naman sa Office of the President para marepaso kag maaprubahan ni Presidente Marcos.
Kon aprubahan sang presidente, mahimo na magsugod ang tax suspension sa masunod nga semana.
Suno sa Department of Finance, kun matuman na ang suspension, mahimo nga magnubo sa P37 ang presyo sang 11-kilogram nga LPG tank, samtang P5.65 naman ang ibuhin sa kada litro sang kerosene.
Pahayag pa nga ginhimo ini nga tikang bangud naglab-ot na sa sobra 100 dolyar kada barrel ang presyo sang krudo sa kalibutan, mas mataas sa 80-dolyares nga threshold sang gobyerno.
Ginklaro man sang ahensya nga wala sa plano nga suspindihon ang tax sa diesel kag gasolina bangud daku ang mahimo nga kawad-an sang kita sang gobyerno, nga ginabulubanta sa P12 bilyon kada bulan.
Dugang pa, mas ginatutukan anay ang LPG kag kerosene bangud mas ginagamit ini sang mga manubo ang kita.
