Indi lang pag-suspend kundi dalayon gid nga pagbasura sa excise taxes sa produktong petrolyo ang ginaduso ni Gabriela Party-list Rep. Sarah Elago.
Sa interview sang Bombo Radyo kay Elago, iya ginpahayag nga daku nga buhin sa palas-anon sang mga Pilipino kun kakason ini nga buwis ilabi na nga may krisis subong sa langis nga ginaatubang sa pungsod nga epekto sang gyera sa Middle East.
Yara subong sa P6 kada litro ang excise tax sa diesel, samtang P10 kada litro naman ang excise tax sa gasolina.
Magluwas diri, ginaduso man sang kongresista ang pagkakas sang 12% nga Value Added Tax (VAT) sa serbisyo kag basic goods kaangay sang pagkaon, tubig, kag elekrisidad.
Nahibaluan nga madugay na ginapamatukan women’s group nga Gabriela ang implementasyon sini nga buwis bangud sang bug-at nga dala sini sa working class.
Sa nauna nga mga protesta, ginlaragway sang grupo ini nga buwis bilang awtomatiko nga palas-anon nga naga-igo sa mga pigado sa kada tion nga may yara sila sang baklon.
Sa pihak nga bahin, matandaan nga ginsertipikahan na ni President Ferdinand Marcos Jr. bilang urgent ang hagna sa Kamara nga amo ang magatugot sa presidente nga i-suspend ukon buhinan ang excise taxes sa petroleum products kun may yara sang national ukon global economic emergencies.
Sa idalom sang amo nga hagna, mahimo ma-adjust sang presidente ang excise tax sa fuel sandig sa mga rekomendasyon halin sa Development Budget Coordination Committee kag sa Department of Energy apang subject pa sa pila ka mga kondisyon.#
