Bastante ang suplay sang Noche Buena items sa probinsya sang Iloilo para sa holiday season.
Sandig sa monitoring sang Department of Trade and Industry (DTI) kag sa pasalig sang retailers and supermarkets , makalab-ot pa pati sa Enero ang mga suplay sa probinsya.
Sa interview sang Bombo Radyo kay DTI Iloilo provincial director Felisa Judith Degala, iya ginpahayag nga domestic ukon locally-produced ang kalabanan sa mga produkto.
Ginpasigurado man sang DTI nga nagasunod ang mga balaligyaan sa suggested retail price (SRP) nga ginpaguwa sang DTI sang Nobyembre 26.
Ang SRP guide ang ginalakipan sang mga produkto kaangay sang ham, keso de bola, cheese, sandwich spread, mayonnaise, pasta—spaghetti noodles, elbow kag salad macaroni— spaghetti sauce, tomato sauce, kag all-purpose cream.
Una na nga nag-isyu sang panawagan ang DTI nga indi pagpataasan ang presyo sang mga nasambit nga produkto subong nga Christmas season.##
