GUIMBAL, ILOILO – Ginakabig sang labing una nga COVID-19 survivor sa Guimbal, Iloilo nga milagro ang natabo sa iya kabuhi.
Sa exclusive interview sang Bombo Radyo kay Tony Gelvero, 65 anyos, iya ginpahayag nga antes pa man nahibaluan nga infected siya sa nasambit nga virus, tatlo ka adlaw nga nagasakit ang iya ulo.
Suno kay Gelvero, iya gin-imnan sang bulong sa pagdumdom nga normal lang nga hilanat ang iya nabatyagan apang bangud nga nagpadayon ang hilanat, gindala siya sa hospital sa ila banwa.
Natingala si Gelvero nga ginpalibotan na siya sang plastic bangud ginasuspetsahan na nga positibo siya sa COVID-19 kag gindala siya sa The Medical City Iloilo.
Pag-abot niya sa The Medical City-Iloilo, natingala na man siya liwat nga may mga doktor kag nurse nga fully equipped ang suksok.
Didto kag gin-isolate siya kag naguwa ang resulta nga nagpositibo siya sa COVID-19.
Suno kay Gelvero, indi niya mapat-od kag wala siya sang ideya kun diin niya nakuha ang virus bangud ang iya mga himata nga halin sa Japan ang lunsay negatibo man sa nasambit nga balatian.
Magluwas sa pag isolate sa iya, gin-intubate man si Gelvero kag nahibaluan nga 15% lang ang iya nga survival rate.
Tuman ang pagapasalamat niya sa mga frontliners sang nasambit nga ospital sa pagtatap sa iya kag paggamit sang ila kaalam kag abilidad agud siya ang mag-ayo.
Dugang pa sang natungdan, nakig upod siya sang naga antus si Hesus apang gin-upod man siya ni Hesus sang ini ang nabanhaw.
Nahibaluan nga kadungan sang Domingo sang Pagkabanhaw, Abril 12, 2020, nakapauli na ang COVID survivor sa ila nga balay matapos nangin madinalag-on batuk sa COVID-19.
