ILOILO CITY – Ginsaysay sang lalaki nga nagpositibo sa Coronavirus Disease 2019 (COVID-19) ang iya pagpanglakaton umpisa sang nag-abot ini sa syudad sang Iloilo halin sa Metro Manila.
Ang lalaki amo si alyas Jong-jong nga taga Ingore, Lapaz, Iloilo City kag isa ka Locally Stranded Individual.
Sa exclusive interview sang Bombo Radyo kay Jong-jong, iya ginpahayag nga naabotan siya sang lockdown sa Metro Manila nga kuntani ma apply lang ini sang trabaho.
Sang nakakita siya sang kahigayunan nga makapauli sa syudad, ginhitso niya ang tanan nga papeles lakip na ang travel pass kag nagpa-idalom man ini sa rapid test sa diin nagguwa sa resulta nga negatibo ini sa Coronavirus Disease 2019 (COVID-19).
Hunyo 11 sang nag-abot sa Caticlan Port ang barko nga ginasakyan niya kaupod ang iban pa nga mga Locally Stranded Individuals.
Nagsakay sila sa Ceres bus padulong sa Ceres Terminal sa Iloilo kag 5:00 sang hapon na ang mga ini naka-abot sa syudad.
Sa ila pagdumdom sugaton sila sang Iloilo City Government kag idul-ong sa facility quarantine apang kapin isa ka oras nga hulat nila kag wala man sang may nag sugat sa ila.
Bangud sini, nadesisyonan na lang sang mga Locally Stranded Individuals nga magpauli sa ila lugar kag si Jong-jong ang nagsakay man sa taxi padulong sa Ingore, Lapaz.
Wala man nagpahibalo si Jong-jong sa mga opisyales sang Barangay Ingore bangud naglaom siya nga negatibo ini sa COVID-19 base man sa iya nga rapid test result.
Hunyo 12 sang nagpadulong ang iya nga pakaisa nga taga Mansaya, Lapuz sa iya bangud naga-obra ini sang iya nga balay.
Hunyo 14 sang nagtambong pa si Jong-jong sang lubong sang iya abyan nga napatay sa Loboc, Lapaz kag pagkatapos sang lubong, nagpauli ini kag nag inom-inom upod ang iya mga abyan.
Gin-ako man ni Jong-jong nga naka pa manicure kag nakahampang man ini sang basket.
Hunyo 17 sang nagguwa ang resulta sang reverse transcription polymerase chain reaction (RT-PCR) test ni Jong-jong kag natukiban nga nagpositibo ini sa COVID-19.
