ILOILO CITY – Ginsaysay sang isa ka witness sa Bombo Radyo ang iya nakit-an nga pagpilit kag pagbutong pasulod sang mga unidentified nga mga lalaki kay alyas Tam kag kay Antony William Landicho sang damlag lang sa Rizal St., Iloilo City Proper.

Sa exclusive interview sang Bombo Radyo kay alyas Marlyn, iya ginpahayag nga nagabakal siya kaupd ang iya mga abyan sang fishball sa kilid sang unibersidad sang nabatian nila nga may nagasinggitan.

Iya nakit-an ang tigulang nga si alyas Tam nga una nga ginbutong sang 3 ka mga lalaki sakay sa puti nga salakyan.

Pilit nga ginabutong sang mga lalaki si Tam apang nagpanguyapot ini sa poste kag may nagpanaog nga isa pa gid ka lalaki halin sa puti nga salakyan agud nga mabuligan pasulod si Tam.

Gilayon nga naglabay pahayag ni Marlyn ang pick up nga salakyan duag grey halin sa convenient store nga nakapondo.

Ginpalapitan sang pick up ang mga lalaki kag may nagpanaog naman nga isa ka lalaki halin sa pick up kag ginhambalan ang mga lalaki nga nagabutong kay Tam nga indi si Tam ang tuyo nila nga pasakyon sa salakyan kundi amo si Landicho nga nagatindog sa kilid.

Suno kay Marlyn, ginbuy-an sang mga lalaki si Tam kag ginpilit naman pasulod si Landicho sa salakyan.

Ginpamangkot nanday Marlyn si Tam kun okay lang bala ini apang nagapangyami ang tigulang kag nagapalanglapsi.

Si Tam pahayag niya ang nagabantay lamang sa iya anak nga matapos ang klase agud nga sugaton.

Padayon sa gihapon nga nagabutungay ang ma lalaki agud nga mapasulod sa salakyan si Landicho.

Nabatian naman nanday Marlyn nga nagasinggitan si Landicho sang tabang kag nagpahayag pa sa mga lalaki nga “Maluoy kamo nong napatay pa ang tatay ko”.

Luyag kuntani nga buligan sang mga abyan ni Marlyn si Landicho gikan sa mga lalaki apang nagpahayag ang isa ka lalaki nga pulis sila kuno kag nag-atras na lamang sanday Marlyn.

Si Landicho pahayag ni Marlyn ang may dala nga tiger-printed nga bag kag plastic.

Ini nga tiger-printed nga bag kag ang plastic ang ginbutang suno kay Marlyn sa salakyan nga duag grey.

Nahibaluan nga ginreklamo mismo sang pamilya ni Landicho nga wala na ang P20,000 nga kwarta sang ila himata kag wala naman ang grocery.

Lunsay P3.00 lamang ang nabilin kay Landicho kag mga dokumento sa paghikot sa hamyang sa iya amay nga napatay.

Gintu-ad man ni Marlyn nga ang duag grey nga pick up ang may plate number nga “FAG 1928”.

Pahayag ni Marlyn, na desisyonan niya nga itu-ad ang tanan nga ila nakita sang Marso 3 agud nga masanagan ang tanan nga matuod nga may duha ka mga lalaki nga pilit ginpasakay sa salakyan nga puti.

Sa una, gin-ako niya nga nakulbaan siya nga ihambal ang tanan niya nga nakit-an apang bangud sa iban nga mga tawo nga nagahambal nga wala ini sang kamatuoran, nadesisyonan niya nga maguwa sa publiko agud nga mabuligan ang mga na biktima.

Nahibaluan nga 5:56 sang hapon natabo ang “abduction” sang Marso 3 kag sang 8:30 sang gab-i gindeklara ang buy bust operation sang Regional Drug Enforcement Unit sa Sta. Filomena, Arevalo, Iloilo City sa diin ang subject amo ang ginkuha nga lalaki sa dalan Rizal nga amo si Landicho.