ILOILO CITY – Napirmahan na ni Iloilo City Mayor Jerry Treñas ang executive order may kaangtanan sa pagdumili sang unnecessary noise sa tion sang class hours.
Santo sa Executive Order 164 sang alkalde, lakip sa mga ginadumili-an amo ang pagpatukar sang videoke, karaoke kag iban pa nga sound producing devices nga nagatuga sang tuman nga gahod kag ginakabig nga distorbo sa mga estudyante nga nagatuon.
Sa interview sang Bombo Radyo kay Treñas, iya ginpahayag nga may plano na ang Sangguniang Panlunsod nga magbalay sang panibag-o nga ordinansa tuhoy diri.
Suno kay Treñas, nakasaad sa Executive order nga ginadumili-an ang pagpatukar sang sound producing devices humalin 7:00 sa aga tubtub 5:00 sa hapon apang may yara lang sang exemption.
May kaangtanan diri, ginpahayag ni Iloilo City Councilor Love-Love Baronda nga mahimo mangin basehan ang existing order nga ginpasar sang 2015 nga naga-regulate sang gahod sa palibot sang syudad.
Suno kay Baronda nga chairman sang Committee on Education, Science and Technology, importante nga magbalay sang panibag-o nga ordinansa tuhoy sa pagdumili sang unnecessary noise agud nga makatuon sang maayo ang mga estudyante nga nagapaidalom sa blended learning.
Mahimo nga mapasar ang ginaduso nga ordinansa sa masunod nga sesyon.
