Masami kita gina-remind nga indi gid maglagaw-lagaw ukon mag-drive sang salakyan samtang kita ang hubog.
Ini agud malikawan naton nga maaksidente, makapangdalahig sang iban nga tawo, ukon mapahuy-an ang aton nga kaugalingon samtang yara sa dalan.
Kaangay halimbawa sa sining isa ka Indian executive sa isa ka daku nga American multinational financial services company nga ginpahayag nagpangihi sa isa ka pasahero sa eroplano bangud sa iya tuman nga kahulugbon.
Ginpahayag nga Nobyembre 26, 2022 pa sang natabo ang insidente sang halin ang Indian executive sa New York kag pauli na sa New Delhi.
Ginkilala ang lalaki kay Shankar Mishra, ang former vice president sang Indian operations sang daku nga bangko sa Estados Unidos sang Amerika.
Gin-alegar nga ginbuksan sini ang zipper sang iya nga pants kag nag-ililihi kag sa kadimalason sang isa ka 72 anyos nga pasahero, siya gid ang natup-an.
Nag-reklamo ang tigulang nga babayi, apang wala man maayo nga na-handle sang airline ang reklamo amo man ang polisa sini sa pag-serbe sang alcoholic drinks.
Sa bahin naman sang lalaki, gilayon man ini nga ginpahalin sa trabaho sang nahibaluan sang management ang amo nga insidente.
Nag-lie low pa si Mishra kag nagpalagyo kag gin-switch off pa sini ang iya nga cellphone halin sang amo nga bulan.
Ginpahayag nga nagpabilin ang kontak sini sa iban niya nga abyan, kag sang damlag lang, may credit transaction ini sa Bangalore sa India rason nga na-trace ang iya nga lokasyon kag gilayon nga nadakpan sang mga pulis. ##
