𝗠𝗔𝗡𝗜𝗟𝗔 — Gintawag ni Executive Secretary Lucas Bersamin nga wala nag-intindihanay kag isa lamang ka aksidente ang natabo nga pagpang-atake sang Chinese Coast Guard (CCG) sa Philippine Coast Guard (PCG) nga natuga sang pagkautod sang tudlo sang isa ka Philippine Navy.
Suno kay Bersamin, indi pa handa ang gobyerno nga i-classify ukon tawgon nga isa ka ‘armed attack’ ang natabo apisar nga nakit-an nga may dala nga mga armas ang Chinese Coast Guard.
Ini ang ginkumpirma man sang Armed Forces of the Philippines (AFP) nga may mga Philippine Navy serviceman ang tuman nga napilasan sa nagluntad nga pagpang-atake sang barko sang China batok sa Filipino vessel samtang nagapatigayon sang resupply mission sa Ayungin Shoal.
Suno naman kay AFP Public Affairs Office chief Colonel Xerxes Trinidad, ang mga napilasan nga serviceman ang hilway nga gin-evacuate agud nga lapatan sang nagakaigo nga pagbulong.
Matandaan nga anay na nga gin-athag ni Presidential Assistant for Maritime Concerns Andres Centino nga ang Mutual Defense Treaty (MDT) ang indi makonsiderar apisar sang natabo nga insidente sa Ayungin Shoal.
Nahibaluan nga ginpangunahan subong nga adlaw ni Bersamin ang ika-duha nga pagsinapol sang National Maritime Council sa Malacañang kasunod sang mandatu sa idalum sang Executive Order No. 57, series of 2024, nga ginpirmahan ni President Ferdinand “Bongbong” Marcos Jr.
