Wala pa sang bastante nga pagtuon ukon data nga nagapamatuod nga mas makalalaton pa ipaanggid sa Delta variant ang Omicron, ang bag-o nga variant of concern nga una na-detect sa South Africa.
Una nga ginpahayag sang World Health Organization (WHO) nga concerning ang mutations sang bag-o nga variant bangud sang mga preliminary evidence nga naga-‘suggest’ nga may increased risk sang reinfection sa sini nga variant.
Ginahibalo man kun makasarang pa ang existing nga COVID-19 vaccines batok sa sini nga variant.
May mga theoretical predictions nga naga-guwa kag gina-link ang mutations sa abilidad sang sini nga variant nga ma-evade ang existing immune protection sang tawo.
Apang sandig sa interview sang Bombo Radyo kay Dr. Philip Ian Padilla, isa ka public health expert, ginatun-an pa lang subong kun daw ano ka epktibo ang antibodies sa pag-neutralise sa new variant. Minimum public health standards man sa gihapon ang ginapanugyan agud nga maproteheran ang lawas batok sa infection.
Importante man ang vaccination suno kay Padilla. Talalupangdon man subong ang madasig nga pag-implementar sang ban sa lain-lain nga mga pungsod.
Suno kay Padilla, importante ini nga paagi agud mapunggan ang pagsulod sang virus sa isa ka lugar.
Nahibaluan nga pila lang ka oras matapos nag-anunsyo ang South Africa nga may na-detect nga new variant nga may multiple mutations, nagpatuman gilayon sang flight ban ang Britanya. Ginsundan ini sang Austria, Canada, France, Germany, Italy, the Netherlands kag Estados Unidos kag iban pa nga dalagku nga pungsod.
Apisar ‘proteksyon’ ang rason kun ngaa may global rush sa pagpatuman sang flight ban, ginpakamalaot naman ini sang South Africa kag gintawag nga “draconian,” unscientific kag baliskad sa abiso sang WHO. ##
