ILOILO CITY– Nagapatigayon sang pagsinapol kada adlaw ang Ad Hoc Commitee tuhoy sa igapatuman nga exit plan sa syudad sang Iloilo.
Sa interview sang Bombo Radyo kay Iloilo City Councilor Alan Zaldivar, iya ginpahayag nga magapadayon ang pagsinapol tubtub nga makadihon sang nagakaigo nga framework.
Suno kay Zaldivar, lakip sa naistoryahan amo ang mandatory nga paggamit sang facemask, pagsunod sa physical distancing, pagpatuman sang curfew, limitahan ang mahimo nga makaguwa sa balay, limitado ang salakyan nga makabyahe kag kun pila lang ka negosyo ang pahanugutan nga magbukas.
Ginpahayag ni Zaldivar nga may yara sang nanari-sari nga phase sa pagpatuman sang exit plan kun sa diin ang Phase 1 ang ginalakipan sang mandatory pagsuksok sang facemask, physical distancing kag pagsunod sa curfew hours humalin 8:00 sa gab-i tubtob 4:00 sang aga.
Ang Phase 2 naman ang ginalakipan sang modified curfew hours sa diin ginaduso nga magasugod ini 9:00 sang gab-i tubtob 5:00 sang aga, mandatory nga pagsuksok sang facemask kag pagsunod sa physical distancing.
Kun makapasar sa Phase 2 suno kay Zaldivar, mahimo na nga makapadayon sa Phase 3 apang kun madamo sa gihapon sang mga nagalapas sa pagsulundan, ibalik ang pagpatuman sang Phase 2.
Sa tion nga mahitso na ang tanan suno sa Konsehal, magapatigayon sang information dissemination tuhoy sa ginapatuman nga pagsulundan tubtub nga makalab-ot sa Phase 4 sang exit plan.
