Nagsungka sa Criminal Investigation and Detection Group (CIDG) ang isa ka ‘expert bomber’ kag mataas nga lider sang New People’s Army (NPA) sa Western Visayas.
Ang expert bomber amo si ‘Ka Alvin’, naghalin sa Negros Island kag senior leader sang NPA regional command armed liquidation squad.
Sa interview sang Bombo Radyo kay Police Lt. Col. Gervacio Balmaceda, chief sang CIDG Region 6, iya ginpahayag nga nangin kabahin si ‘Ka Alvin’ sa mga dalagko nga ambush kag assassination sa diin madamo ang napatay nga inosente nga katapo sang Philippine Army kag Philippine National Police sa Western Visayas.
Suno kay Balmaceda, santo sa pag-ako sang expert bomber, nangin kabahin ini sang pagpangbomba, pag-ambush, kag assassination sa mga masunod:
- Engkwentro sa Himamaylan, Negros Occidental sang 2000 sa diin napatay ang 17 ka myembro sang Philippine Army;
- Engkwentro sa Calinog, Iloilo sang 2005 sa diin napatay ang siyam ka myembro sang Philippine Army kag 18 ang pilason;
- Hit and run ambush sa Aleosan, Alimodian, Iloilo sang 2008; kag
- Pagpang-ambush sa pila pa ka bahin sang Western Visayas lakip na sa Iloilo City
Ginpahayag ni Balmaceda nga nagtraining pa sa Malaysia si ‘Ka Alvin’ sa sulod sang anom ka bulan agud tun-an ang pagkapyot sang nagkalain-lain nga armas kag paghimo sang tanan nga sahi sang bomba.
Pat-od man suno sa natungdan nga mahimo lagson si ‘Ka Alvin’ sang iya mga kaupdanan sa NPA bangud sa pagsungka sini rason nga indi man nila pag i-waragwag ang pangalan sini.
Sa subong, iga-endorso sang CIDG ang anay myembro sang NPA sa regional office sang Philippine National Police kag National Task Force to End Local Communist Armed Conflict (NTF-ELCAC).
Samtang, gin-ako naman sang expert bomber nga tuman na kabudlay ang iya ginapang-agyan sa diin madugay naman niya nga narealisar ang indi mahapos nga pagpangabuhi bilang myembro sang NPA.
Sa exclusive interview sang Bombo Radyo kay ‘Ka Alvin’, iya ginpahayag nga tuig 2018 sang nagdesisyon siya nga magpanaog bilang mataas nga myembro sang terorista nga grupo.
Suno kay ‘Ka Alvin’, dalagko naman ang iya mga kabataan rason nga indi na niya luyag nga madalahig man ang mga ini bangud sa iya pagpakigbahin sa rebelde nga grupo.
Ginsaysay man niya nga 12 anyos pa lamang siya sang nangin myembro siya sang NPA.
Didto kag natun-an niya kun paano maghimo sang tanan nga sahi sang explosives sa diin nagtraining pa siya sa Malaysia.
Gin-ako man niya nga kabahin siya sang dalagko nga serye sang pagpangbomba kag pagpamatay sa Western Visayas.
