Duha ang patay kag 31 ang pilason matapos nagluntad ang explosion sa isa ka industrial park kun sa diin nahamtang ang pila ka mga chemical companies sa Leverkusen sa Germany.
Lima man ang missing bangud sa amo nga insidente.
Partikular nga natabo ang paglupok sa waste management facility sa Chempark site kun sa diin yara ang chemical companies nga Bayer kag Lanxess.
Suno kay Bombo International Correspondent Aimee Andaya Hilger direkta sa Germany, santo sa report sang local officials, natabo ang explosion sa storage tanks para sa solvents.
Apat ka oras ang paninguha sang mga bombero antes naghagan-hagan ang kalayo.
Una nga ginpahayag sang Federal Office for Civil Protection and Disaster Assistance sa amo nga pungsod nga may “extreme threat” nga dala ang insidente apang sunod nga nagpahayag ang Cologne fire department nga wala sang ‘any kind of abnormality’ sa measurements sa air pollution sa amo nga lugar.
Sa subong padayon pa ang pag-monitor sang mga otoridad sa aso halin sa chemicals site.
