ILOILO – Ginkumpirma sa Bombo Radyo ni Iloilo Regional Trial Court Branch 35 Presiding Judge Daniel Antonio Gerardo Amular nga liwat nga gin-raffle ang expropriation case nga ginpasaka sang MORE Electric and Power Corporation batok sa Panay Electric Company.
Ini ang may kaangtanan sa pag-agaway sang duha ka kompaniya agud nga mangin electric power distributor sa syudad sang Iloilo.
Nauna na nga nagpaguwa sang order si Amular nga luyag niya nga sayluhon sa iban nga Regional Trial Court ang pag-uyat sang kaso bangud sa pila ka mga rason may kaangtanan sa plaintiff kag sa defendant.
Lakip sa mga rason nga ginplastar ni Amular amo nga luyag niya nga malikawan ang “BIASES” kag “PAMULITIKA” samtang ginapatigayon ang expropriation hearing.
Isa man sa ginplastar nga rason ni Amular amo ang tuhoy sa ginapaguwa nga balita sang media nga mahimo makaapekto sa dalagan sang kaso.
Ang nasambit nga order ni Amular ang ginpaboran ni Executive Judge Victor Gelveson kag ang kaso ang gintugyan kay Presiding Judge Ma. Theresa Gaspar sang Branch 33 sang Iloilo Regional Trial Court.
