ILOILO – Ipatuman na umpisa sa Marso 21 ang extended curfew hours sa probinsya sang Iloilo.
Sa ginpatigayon nga sesyon, napasar sa Sangguniang Panlalawigan ang Provincial Ordinance no. 20-220 ukon ang “An Ordinance Implementing Curfew Hours in the Entire Province of Iloilo as a Measure to Address the Continous Threat of the Transmission of COVID-19.”
Sa interview sang Bombo Radyo kay Iloilo 4th District Board Member Rolando Distura, iya ginpahayag nga ang curfew hours ang maga-umpisa 9:00PM-4:00AM kag ini ang magalawig tubtub nga madula ang COVID-19 threat sa pungsod.
Suno kay Distura, ang Provincial Ordinance ang pagapirmahan pa ni Iloilo Governor Arthur Defensor Jr. kag iga-publish sa mga pamantalaan.
Ginpahayag ni Distura nga may yara sang exemption sa nasambit nga ordinansa kasubong na lang sang government officials kag employees nga nagapatigayon sang official functions, mga empleyado nga halin sa trabaho kag tuyo na nga magpauli, health professionals ukon health care providers, emergency responders, legal and paralegal profession, medical emergency, food delivery kag raw materials apang limitado lanag sa driver kag duha ka pahinante, empleyado sa private sector nga may yara sang work schedule nga nasanto sa curfew hours apang kinahanglan lang nga magpakita sang Identification Card ukon Certificate of Employment.
Sa tion sang curfew hours, ginpahayag sang natungdan nga dapat wala sang may nagabyahe nga mga pampubliko nga salakyan.
Katuyu-an sang pagpasar sang nasambit nga ordinansa suno sa natungdan amo nga malimitahan ang paglapta sang virus.
Lakip sa magapatuman sang nasambit nga ordinansa amo ang Municipal Mayor, Social Welfare Officer, Philippine National Police, Barangay Officials kag Branagy Tanod.
