ILOILO CITY – Magapabilin sa pungsod Lebanon ang amo nga lalaki sang ginpatay nga Ilongga OFW nga si Joanna Daniela Demafelis sang Barangay Ferraris, Sara, Iloilo.
Suno sa Kuwaiti state media, ginbalibaran sang Lebanon ang hingyo sang Kuwait nga ma-extradite pabalik si Nader Essam Assaf para ipaidalom sa trial sa pungsod kun sa diin natabo ang krimen.
Ginpanindugan ni Lebanese Minister of Justice Salim Gryasati nga bangud isa ka Lebanese si Assaf, sila ang may jurisdiction sa amo ni Demafelis.
Ginatugyan sang Lebanon sa ila Public Prosecution Office ang kaso ni Assaf.
Suno pa kay Minister Gryasati, kabahin ini sang ila ginpirmahan nga kasugtanan sang Kuwait.
Apang gin-athag sang Lebanon nga kinahanglan nila ang bulig sang Kuwait ilabi na sa mga ebidensiya.
Una na ginpahayag sang Kuwait nga apisar indi mabalik ang mga suspek, magapatigayon ang pungsod sang trial in absencia batok sa mga amo ni Demafelis.
Nahibaluan nga matapos ginpatay, ginsulod pa sa freezer ang bangkay sang Ilongga OFW.