May nagapabilin nga extradition treaty sa tunga sang US kag Pilipinas, pinaagi diri mahimo nga ma extradite ang self proclaimed “appointed son of God” Pastor Apollo Quiboloy.
Sa interview sang Bombo Radyo kay Atty. Noel Palomado, iya ginpahayag nga mahimo nga magpadala sang request ang Estados Unidos sa Pilipinas nga i-arrest kag i-extradite pabalik sa US si Quiboloy agud nga masabat ang mga akusasyon batuk sa iya.
Nahibal-un nga nalakip sa ginpagwa nga wanted list sang US Federal Bureau of Investigation (FBI) si Quiboloy bangud sa kaso nga “conspiracy to engage in sex trafficking by force, fraud and coercion kag sex trafficking of children; conspiracy; bulk cash smuggling.”
Ang extradition treaty amu ang international agreement sa diin ang Requested State ang nagpasugot sa request sang Requesting State sa idalom sang specified conditions nga; i-turn over ang subject person nga yara sa ila nga jurisdiction nga nakakomiter sang krimen ukon makabig nga fugitive sa Requesting State.
Suno kay Atty Palomado, mabudlay lang sa tunga sang extradition treaty ang political kag religious cases.
Apang, indi naman makabig nga religious ang sex trafficking cases batok kay Quiboloy.
Samtang, mahimo naman nga i-alegar sang kampo ni Quiboloy nga ini isa ka political issue bangud sa iya malapit nga relasyon kay Presidente Rodrigo Duterte.
Madamo naman nga proseso ang pagaagyan sang sini nga agreement pinaagi man sa Department of Justice (DOJ).
Una naman nga ginpahayag sang Philippine National Bureau of Investigation (NBI) nga wala pa sila may nabaton nga “formal communication” halin sa FBI.
