Ginkibot sang F2 Logistics ang Filipino sports fans matapos sini gin-anunsyo ang pag-untat na sang Cargo Movers women’s volleyball team matapos ang walo ka tuig nga dalayawon nga performance sa professional kag amateur scenes.
Sa statement nga ginpaguwa kasunod sang ila kapaslawan sa ila kampanya sa 2023 Premier Volleyball League (PVL) Second All-Filipino Conference, ginpahayag sini nga magasaylo na lamang ang focus sini sa “grassroots” development sang volleyball.
Gin-cite man sini ang sunod-sunod nga injuries nga naangkon sang players sang nagliligad nga bulan rason nga kinahanglan hatagan sang prayoridad ang ikaayong lawas ipaanggid sa mga kadalag-an nga ila nalab-ot sang nagligad nga mga tinuig.
Ginpasalamatan sang team ang ila nga fans kag nagpasalig nga padayon ini nga maga-suporta sa paghampang sang volleyball sa Pilipinas partikular na sa De La Salle Lady Spikers kag magahatag man sang bulig sa University of Perpetual Help.
Sa duha ka tuig sini nga pagpasakop sa Premier Volleyball League, ang makabig nga best ending amo ang pagpangatlo sini sa una nga All-Filipino Conference.
Naglagbong ini sa 4-7 record sa ikaduha nga All-Filipino Conference kag bangud wala ang nagapanguna nga stars nga sanday Kianna Dy, Myla Pablo, kag Jolina dela Cruz, nagpanaog lamang ini sa ikawalo nga pwesto.
Sa masunod nga season sang PVL sa 2024, bangud sa disbandment sang six-time Philippine Superliga champions, nabutang man sa kwestyon kun sa diin magasulod ang players lakip sanday Dy, Pablo, Dela Cruz, Dawn Macandili-Catindig, Ivy Lacsina, Ara Galang, kag Aby Maraño.
Mangin si PVL President Ricky Palou ang nagsiling nga wala man sang maathag nga rason nga ginhatag ang F2 Logistics management sa ila anunsyo sa ila nga disbandment.
Ginakonsiderar ang posibilidad nga magabukas ang pwerta sang PVL para sa panibag-o nga team.
(Photo is from F2 Logistics.)
