Maga-abot sa Pilipinas ang tatlo sa original members sang F4 nga sanday Jerry Yan, Vic Chou, kag Vanness Wu, kaupod ang front man sang Taiwanese band nga Mayday nga si Ashin.
Kabahin ang Manila sa libuton sang grupo para sa “F Forever” tour apang wala pa ginhatag ang eksakto nga petsa sang ila pagbisita sa pungsod.
Umpisahan ang ila world tour sa Chongqing, China sa April 10-12, pagasundan sang Jakarta, Indonesia sa May 29 -30, kag may tour stops man sa Bangkok, Singapore kag Kuala Lumpur.
Wala nalakip sa lineup si Ken Chu.
Antes pa man sini, nagkumpirma na ang singer-actor sang Disyembre nga indi siya mag-upod sa long-anticipated comeback bangud wala siya nalakip sa istoryahanay sa reunion concerts. Gin-alegar sini anay nga wala nakahatag ang B’in Music sang contract ukon formal agreement.
Nakilala ang F4 kasunod sang hit 2001 drama nga “Meteor Garden” nga nangin cultural phenomenon sa Asia lakip na sa Pilipinas.
Ini nga series ang nakabase sa Japanese manga nga “Boys Over Flowers” ni Yoko Kamio kun sa diin bida si Barbie Hsu ukon mas bantog nga si Shan Cai.
Napatay si Barbie sang Pebrero 2025 bangud sang influenza-related pneumonia.
Bilang isa naman ka music group, naka-release ang F4 sang albums lakip na ang “Meteor Rain” (2001), “Fantasy 4ever” (2002), kag “Waiting for You” (2007). Nag-updanay ang F4 members sa walo ka tuig, apang nagseparar sang banas sang 2009.
Apat ka tuig matapos ang disbandment, nag-updanay sila liwat sa Spring Festival Gala sa China sang 2013.
