Nakitaan sang paglitik ang facade sang Iloilo Central Market matapos ang magnitude 4.8 nga linog kagab-i.
Nagalab-ot sa ginabulubanta isa ka metro ang kalabaon sang amo nga litik, lakip na ang mga hairline cracks nga makit-an sa nauna nga bahin sini.
Sa interview sang Bombo Radyo kay Eduardo Elito, isa ka helper sa isdaan sang central market, iya ginpahayag nga wala pa sang mga litik nga nakit-an ang mga ini kahapon nga adlaw sa amo nga bahin sang central public market.
Matapos ang mabaskog nga linog kagab-i, natalupangdan lang nila ang amo nga mga litik kaina sang aga samtang ang mga ini ang nagapangape sa isa ka bakery sa tabok sang amo nga merkado.
Sa karun, ginbutangan na lamang sang barikada sa amo nga bahin sang nasambit nga merkado, agud malikawan ang mga kahalitan nga possible dala sang amo nga mga litik.
Madumdoman nga ginbuksan ang nasambit nga merkado sang Oktubre 30,2025.
