Luyag paatubangon ni Senate President Pro Tempore Ping Lacson si Zaldy Co sa anay staff member sini nga si Orly Guteza kag sa iban pa nga anay mga soldado nga naga-alegar nga nagdul-ong sang kuwarta sa iya sang una.
Suno kay Lacson nga amo ang chairman sang Senate Blue Ribbon Committee, plano sini nga dungan nga pakadtuon sa hearing sang panel ang amo nga mga personalidad agud mahibaluan kun sin-o sa ila ang nagasugid sang matuod.
Nahibaluan nga may pending nga show cause order ang Blue Ribbon Committee para kay Co.
Magalisensya naman si Lacson sa Sandiganbayan agud pasugtan ang anay kongresista nga mag-atubang sa committee kun mapabalik na ini sa Pilipinas matapos nadakpan sa Czech Republic.
Matandaan nga si Guteza amo ang testigo nga ginbitbit ni Senator Rodante Marcoleta agud magtestigo sa Senado.
Isa siya ka ex-marine nga nag-alegar nga nag-deliver sang dalagku nga bag sang kuwarta kanday Co kag former House Speaker Martin Romualdez.
Halin sang ginpagwa ni Guteza ang amo nga alegasyon, nangindulaan na ini kag tubtub subong wala pa nakit-an.
Ang mga anay soldado naman nagalakip sang 16 ka mga ex-marines nga nag-alegar nga nagdul-ong sila sang P805 billion nga kuwarta sa high-ranking officials lakip na sa mga kongresista.
Matandaan nga gin-suspend anay ni Lacson ang hearing sang Blue Ribbon Committee samtang nga wala pa nakalab-ot sa siyam ang pirma sa partial report sang Blue Ribbon kaangot sa flood control scandal.
Una na nga ginpahayag ni Lacson nga ginpalibot na ang report para mapirmahan halin pa sadtong Pebrero, apang may mga senador nga indi kumbinsido sa pag-pirma.
Kumpyansa gihapon si Lacson nga ma-secure sini ang mayorya sang 17-member panel agud nga mapasaka sa plenaryo ang amo nga report.
