Ginpalawig pa ni Iloilo City Mayor Jerry Treñas tubtub subong nga adlaw, Mayo 9, ang suspensyon sang face-to-face nga klase sa syudad sang Iloilo bangud sa mataas nga heat index forecast.
Epektibo ini sa tanan nga lebel sa pribado kag pampubliko nga mga eskwelahan nga sulod sa hurisdiksyon sang Iloilo City.
Mahimo naman makapadayon sa in-person classes ang mga eskwelahan nga may airconditioned classrooms.
“I hereby declare the suspension of face-to-face classes in all levels both public and private in Iloilo City due to forecasted heat index of 42 degrees by PAGASA. For those schools with air-conditioned classrooms, you have the discretion to hold face-to-face classes,” kabahin sang announcement sang alkalde.
Una na nga ginpahayag sang Philippine Atmospheric, Geophysical and Astronomical Services Administration (PAGASA) nga “worst is over” pag-abot sa init sa pungsod kag possible nga magtahaw-tahaw na sa bulan sang Mayo.
Ang city kag provincial government ang una naman nga nagplastar sang ila preparasyon para sa La Niña phenomenon ukon sobra-sobra nga pag-ulan nga amo naman ang ginalantaw nga magabulos sa masunod nga binulan.#
