Nagpaguwa si Iloilo City Mayor Jerry Treñas sang executive order nga nagasuspinde sang face-to-face classes halin preschool tubtub senior high school sa Iloilo City halin Abril 1 (subong nga Lunes) tubtub sa Abril 2 (Martes) bangud sa tuman ka init nga tyempo.
Epektibo ini nga order para sa pampubliko kag pribado nga mga eskwelahan sa syudad.
Sa Executive Order 47 sang alkalde, nakasaad man nga ang face-to-face classes sa college level, pati na sa graduate school, ang mahimo man makanselar ukon masuspinde DEPENDE sa ila school heads/administrator.
Ginsulit man sa sini nga order ang nauna na nga mandu sang Department of Education sa elementary kag secondary schools nga mahimo makasaylo sa alternative delivery modes kaangay sang modular kag online classes pananglitan may suspensyon sang face-to-face classes bangud sang tuman ka taas nga temperatura.
Gina-abisuhan man ang mga estudyante nga mag-inom sang madamo nga tubig, magpabilin sa sulod sang balay kag magsuksok sang light-colored nga panapton samtang nagatagiti ang init.
Sa forecast sang DOST-PAGASA, magatupa sa 41 degrees Celsius ang heat index sa Iloilo City buwas kag 42 degrees celsius naman sa Martes nga adlaw.
Antes sini, sunod-sunod man nga yara na sa “danger level” (42 degrees Celsius paibabaw) ang klasipikasyon sang heat index sa Iloilo City ilabi na kadungan sang Semana Santa.#
