ILOILO CITY – Magasugod na bwas nga adlaw, Marso 13 ang face-to-face classes sa West Visayas State University (WVSU) pagkatapos sang halos duha ka tuig nga pagpatigayon sang online learning modality bangud sa COVID-19 pandemic.
Sa interview sang Bombo Radyo Iloilo kay Dr. Joselito Villlaruz, presidente sang West Visayas State University, iya ginpahayag nga indi tanan nga mga estudyante ang mahimo nga makabalik sa eskwelahan para sa face-to-face classes kundi ang mga programs gid lamang nga naga-require sang face-to-face learning.
Dugang pa sang presidente, ang mga vaccinated gid lamang nga mga estudyante, teaching personnel kag staff sang eskwelahan ang mahimo nga makabalik sa eskwelahan.
Indi mandatory ang pag-attend sa face-to-face classes kag magapadayon sa gihapon ang delivery of education para sa mga nagpili nga mag-eskwela online.
Ginalimitahan gid lamang sa 50-70% ang capacity sang mga classrooms kag may cycle ang mga estudyante sa pagbalik sa eskwelahan.
May mga pagsulundan nga ipatuman ang unibersidad agud nga malikawan ang COVID-19 virus infection kag nagtukod sang crisis management committee.
Nakahanda naman sang proseso ang eskwelahan sa tion nga may yara sang ma-infect sang virus.
I-lockdown ang unibersidad agud nga makapatigayon sang disinfection kun kinahanglan.
