Nagtukod na sang fact finding committee ang Iloilo Provincial Government agud ma-imbestigaran ang kontrobersyal nga hitabo sa isa ka ospital sa Barotac Viejo, Iloilo kun sa diin ginbalibaran sang hospital personnel ang hingyo sang pulis sang Banate Municipal Police Station nga dapatan sang pagbulong ang biktima sang pagpangastigo sa amo nga banwa.
Sa interview sang Bombo Radyo kay Iloilo Provincial Administrator Atty. Suzette Mamon, iya ginpahayag nga igapasa na sa Provincial Legal Office ang incident report sang Governor Niel D. Tupas, Sr. District Hospital agud ma-id-idan sang fact finding committee sa sulod sang 30 ka-adlaw.
Suno kay Mamon, kuhaan man sang pahayag sang amo nga komitiba ang pila ka personnel sang nasambit nga ospital lakip na ang mga police personnel sang Banate Municipal Police Station nga amo ang nagdala sang pasyente nga biktima sang mauling incident.
Pahayag niya, sa tion nga makapasa ang komitiba sang rekomendasyon sa opisina ni Iloilo Governor Arthur Defensor Jr., diri kag desisyunan ang masunod nga tikang angot sa isyu.
