CABATUAN, ILOILO – Ginakabig sang isa ka faith healer nga bugay halin sa Ginuo ang iya ikasarang sa pagpamulong.
Sa Good Morning Philippines program, ginpatpat sang faith healer nga nagpahinago lang sa pangalan nga Jessie sang Cabatuan, Iloilo, kun paano nag-umpisa ang iya pagpamulong kag ang pagpangolekta sang santos.
Suno kay Jessie, tunga ang opinyon sang publiko kun epektibo ang faith healer apang para sa iya, ang pagpangamuyo lang kag ang pagsalig sa Ginuo ang iya ginasandigan.
Ginpahayag ni Jessie nga 21 ka tuig siya nga nagapamulong paagi sa pagpangamuyo ilabi na sa mga nagapangayo sang guidance sa pagkuha sang pasinawan, mga nagabalati-an kag ang mga may yara sang problema.
Sa iya career bilang faith healer, ginpahayag ni Jessie nga ang pagpaayo sa isa ka buang ang labing una niya nga kliyente nga napaayo.
Gin-athag sang natungdan nga kun nagakinahanglan sang atensyon medikal ang kliyente, wala man niya ini ginapunggan nga magpakunsulta kag magpabulong sa doktor.
Sa ila pamilya suno kay Jessie, wala siya sang himata nga manugbulong ukon faith healer apang nagapati ang natungdan nga gintagna siya sang Ginuo agud nga makabulig sa mga nagakinahanglan.
Sa baylo nga kwarta ang ibayad, ginpahayag ni Jessie nga iya nga ginahingyo sa iya mga kliyente nga maghatag sang imahe ukon santos agud nga makabulig pa gid sa iban.
Sa subong suno kay Jessie, indi na niya maisip ang mga santos nga yara sa ila balay nga iya ginapangamuyu-an sa tion nga may yara sang magpangayo snag bulig sa iya.
