Sa tuman ka daku nga pangalan sang Argentine superstar nga si Lionel Messi, indi ka na makibot sang sarang mahimo sang fans agud lamang makapalapit sa amo nga football star nga ginakabig sang madamo nga G.O.A.T ukon Greatest Of All Time!
Sa China, napilitan ang otoridad nga i-ban sa football stadiums ang isa ka football fan matapos ini naghimo sang eksena, nagdalagan sa tunga sang pitch ukon playing field, kag naghakos kay Messi sa second half sang hampang.
Suno sa Chinese police, gin-detain ang amo nga 18-anyos nga fan nga ginkilala sa apelyido nga Di. Wala partikular nga gin-detalye kun ano kalawig ang administrative detention sa iya, apang ginpahayag nga isa ka tuig ini nga banned sa pagsulod sa football stadiums.
Natabo ang agaw-eksena ni Di sang may friendly match ang Argentina kag Australia sa Workers’ Stadium sa Beijing sang nagligad nga semana.
Nakit-an sa video nga halin sa corner sang pitch ang football fan, nakalusot sa guards, kag nagdalagan pakadto kay Messi nga pareho sa iya nagasuksok man sa number 10 nga jersey sang Argentina.
Makit-an man ang kakibot sang world champion apang sang ulihi, ginhakos sini pabalik ang Chinese fan, apang tuman lamang ka dasig ang hitabo bangud nagakuyampad man ang tatlo ka security guards agud malagas ang Chinese football fan.
Nagsige sa pagdalagan ang fan; apang wala man sini ginpalampas ang pag-high five sa goalkeeper sang Argentina nga si Emiliano Martinez.
Sang ulihi, nakasandad ang solterito kag amo pa lang nadakpan sang guards kag ginbalik sa stands kun sa diin nagahinugyaw ang mga tawo kag halos mapa-“Sana All” bangud bisan nadakpan ini sang gwardya, nakahakos naman ini kay Messi kag naka-‘up here’ kay Martinez.
Suno sa pulis, nagpangayo naman sang pasaylo ang football fan bangud sa iya nga ginhimo kag ginbaton sini ang ginpapanaog nga penalidad halin sa public security organ.
May video man ini nga nagapangayo sang sorry kay Messi nga sa amo sini nga paagi sila nagkit-anay; apang iya man ginrason nga gusto lang niya ang autograph, apang wala na ini napangayo bangud sa iya pagpalagyo sa mga guwardya.
Nahibaluan nga sang ginpatigayon ang hampang nanday Messi batok sa Australia, masobra 50,000 ka Chinese fans ang nagdugok kag nagbatas sang kainit agud saksihan ang 2-0 nga kadalag-an sang Argentines batok sa Socceroos. Kalabanan sa mga nagkadto ang nagsuksok sang replica shirts nga may numero dies kag pangalan ni Messi. May ginatos man ka fans nga nagdugok sa guwa sang luxury hotel kag naglinya sa guwardyado nga dalan sa paglaum nga makapalapit kag makalantaw sa 35-anyos nga seven-time winner sang Ballon d’Or. #
