Nagpatigayon sang Farm and Fisheries Cluster and Association Program ukon F2C2 ang Department of Agriculture sa syudad sang Iloilo.
Ini nagsugod halin Septyembre 22 kag magatapos tubtob Setyembre 25 sa isa ka mall sa syudad.
Sa interview sang Bombo Radyo kay Clark Melendres, F2C2 focal person sang Department of Agriculture, Western Visayas, iya ginpahayag nga paagi sa sini nga programa mabuligan nga mangin mabakod indi lang sa produksyon sang mga produkto sang mga mangunguma ukon mangingisda, kundi mangin isa ka business enterprise, kag makabaton sang mas maayo nga access sa merkado.
Suno kay Melendres, gintambungan sang masobra 470 ka farmer leaders ang programa halin sa nagkalain-lain nga rehiyon sa bug-os nga Pilipinas.
May tinutuyo ini nga maghatag sang platforms sa mga mangunguma kag manugpangisda nga gusto pa mapasangkad ang ila nga pangabuhian.
Paagi sini direkta nga mapamatian sang ahensya ang mga problema nga gina-atubang sang mga mangunguma kag mga manugpangisda.
Nahibaluan nga kada tuig, nagatipon ang mga mangunguma, manugpangisda, asosasyon kag kooperatiba halin sa nagkalainlain nga rehiyon agud magbayluhanay sang mga ideya, diskusyunan ang nagkalain-lain nga pagpanghangkat, kag magpaambit sang mapuslanon nga ideya sa organisasyon.
