ILOILO CITY – Nagpangayo sang gamay nga tion ang Roll-On Roll-Off (RORO) vessel nga FastCat agud mahandaan na ang pagpasakay sang mga pasahero nga magabyahe halin sa Iloilo City padulong sa Bacolod City and vice versa.
Sa interview sang Bombo Radyo kay Iloilo City Mayor Jerry Treñas, iya ginpahayag nga magaplastar pa sang crew ang nasambit nga sea vessel agud sarang maka-cater sang mga pasahero.
Ini ang nahisugtan matapos nga nagapang-alang ang mga fast craft operators nga magbalik sa pagbyahe bangud sa ginapanan-aw nga tuman ka gamay nga numero sang magabyahe.
“Wala kita sang problema sa Bacolod City. Wala kita sang problema sa MARINA Region VI. Ang problema naton amo ang fast craft kay sila mismo ang nagahambal nga tuman ka diutay ang mga pasahero,” pahayag sang alkalde.
Nahibaluan nga wala sang untat ang byahe sang FastCat halin sang una bangud nagadul-ong ini sang cargo sa duha ka syudad kag wala sang pasahero.
Kun mahanda na ang mga crew suno kay Treñas sa masunod nga mga inadlaw, ipatuman sa mga pasahero ang ‘one seat apart’ policy kag iban pa nga minimum health protocols.
