Nangindulaan ang official Facebook account ni suspended Bamban, Tarlac Mayor Alice Guo matapos ini gin-call out ni Senator Risa Hontiveros nga maka-post gani ini sa iya social media account apang wala nagatambong sa hearing sa Senado.
Matandaan nga subong nga adlaw, nagpahayag si Hontiveros nga dapat magpakita na ang kontrobersyal nga alkalde kag sabton ang mga isyu batok sa iya. Ginplastar man sini nga ginagamit pa ni Guo ang Facebook sa pagpalapta sang fake news bangud ginasugid-sugid sini nga isa siya ka Pilipino apisar napamatud-an na sang National Bureau of Investigation (NBI) nga siya kag ang Chinese national nga si Guo Hua Ping ang isa lamang ka persona.
“Nakakainsulto sa mamamayan na ginamit mo ang nasyonalidad namin para magpayaman, manloko, at magpasok ng mga POGO na puro krimen ang dala sa bansa,” kabahin sang gin-post sang senadora.
As of posting time, indi na kit-anon ang contents sang Facebook page ni Guo.
Matandaan nga antes nag-post si Hontiveros, naka-post pa si Guo kadungan sang iya 32nd birthday kun sa diin malawig ang lista sang iya ginpasalamatan. Gin-claim sini nga isa siya ka Pilipino kag palangga gid sini ang Pilipinas.
Sang weekend, ginserbe na ang arrest order nga ginpaguwa sang Senado bangud sa sulit-sulit sini nga pag-absent sa hearing sang upper chamber, apang wala nakit-an si Guo sa farm kag sa rehistrado sini nga mga address.
Una na nga gin-rason sang legal counsel sini nga naga-eksperyensya ang alkalde sang anxiety kag trauma kasunod sang mga pamangkot sa Senado rason nga mas ginpili sini nga indi na lamang magsipot pa sa tion nga ipatawag siya sang Senate committee on women, children, family relations and gender equality nga ginapamunuan ni Sen. Hontiveros. #
