Nag-isyu na ang US Federal Bureau of Investigation (FBI) sang WANTED posters nga nagapakita sang nawong ni Kingdom of Jesus Christ (KJC) founder kag pastor Apollo Carreon Quiboloy, ang self-proclaimed ‘owner of the universe’ kag ‘appointed son of God’.
Sa website sang FBI, nakasaad nga lakip sa aliases nga ginagamit ni Quiboloy amo ang “The Appointed Son of God”, “Sir”, “Pastor” kag “ACQ”.
Suno sa FBI, wanted si Quiboloy bangud sa ginaalegar partisipasyon sini sa labor trafficking scheme nga amo ang nagdala sa church members sa United States paagi sa fraudulently-obtained nga mga visa.
Ginapahayag nga ginpwersa man sini ang mga myembro nga mag-solicit sang donasyon para sa bogus nga charity.
Ini nga mga donasyon ang ginpahayag gingamit agud nga ma-finance ang church operations kag ang lavish lifestyles sang mga lider sini.
Ang mga myembro nga maka-solicit para sa simbahan ang ginaalegar ginapwersa nga mag-sulod sa sham marriages ukon ginapa-obtain sang fraudulent student visas agud magpadayon sa pagpang-solicit sa Estados Unidos sa bilog nga tuig.
Suno pa sa FBI, may mga babayi nga gina-recruit agud nga magtrabaho bilang personal assistants ukon ‘pastorals’ para kay Quiboloy.
Ginapahayag nga ang mga babayi ang nagapreparar sang iya nga pagkaon, nagalimpyo sang iya nga balay, kag required man para sa ‘night duty’ ukon magpakighilawas sa kay Quiboloy. Sandig pa sa post sang FBI, may koneksyon si Quiboloy pati sa Calabasas, California, Las Vegas, Nevada, kag Kapolei, Hawaii.
Dala man sa gin-tag nga ‘Wanted’ sa FBI amo ang duha ka iban pa nga church members nga sanday Teresita Tolibas Dandan kag Helen Panilag.
Matandaan nga sang Nobyembre, si Quiboloy kag ang iban pa nga church officials kag duha ka iban pa nga US-based church administrators ang gin-indict sa US bangud sa ginaalegar sex-trafficking operation nga nagapangbiktima sang mga menor de edad “as young as 12” kag may “eternal damnation” kag physical abuse.
“If you have any information concerning this person, please contact your local FBI office or the nearest American Embassy or Consulate,” suno sa official website sang FBI. ##
