ILOILO CITY – Natapos na ang feasibility study sa Panay-Guimaras-Negros Bridge apang ginbalik ini sang Department of Public Works and Highways sa consultant sang China bangud tuman ka mahal ang kada kilometro sang apat ka lane sang taytay.
Ang Panay-Guimaras-Negros Bridge ang kabahin sang Build-Build-Build program sang Duterte Administration.
Sa interview sang Bombo Radyo kay Senate Minority Leader Franklin Drilon, iya ginpahayag nga ginpa review sang Department of Public Works and Highways sa consultant sang China ang P11 billion per kilometer nga gastuhon sang gobyerno sa pagpakaayo sang nasambit nga taytay.
Ginabanta nga yara sa P212 billion ang mahimo magasto sang gobyerno sa pagpatukod sang Panay-Guimaras-Negros bridge sa diin kabug-osan nga P2.4 trillion ang balor sang 75 ka mga proyekto sa idalom sang Build-Build-Build project sang administrasyon.
Ginalantaw ni Drilon nga ma-umpisahan ang konstraksyon sang Panay-Guimaras-Negros-Bridge sa 4th quarter sang 2021 kag magalawig ini sang anom ka tuig antes matapos ang proyekto.
Suno kay Drilon, sa tion nga pasado na sa DPWH ang estimated nga balor sang taytay, ipadala ini gilayon sa National Economic and Development Authority kag mismo ang ahensya ang maga-assess kun bala i-aprub ang feasibility study.
Matapos nga ma-aprubahan, patigayunon ang bidding kag ang engineering design para sa Panay-Guimaras-Negros bridge.
Ginalantaw sang DPWH nga sa 2026 mahimo na nga matapos ang nasambit nga taytay.
