Nagalaum ang Swiss tennis star nga si Roger Federer nga maka-recover na sa iya nga latest knee surgery kag makabalik sa ATP circuit sa masunod nga season.
Wala na nakahampang ang nasambit nga 20-time Grand Slam title winner kag former world number one halin sang napyerde ini sa quarterfinals sa Wimbledon kapin isa ka tuig na ang nagligad.
Ang iya latest nga operasyon sa tuhod amo na ang iya ikatatlo nga surgery sa sulod lang sang 18 ka bulan.
Importante para sa iya ang masunod nga tatlo tubtub apat ka bulan gani ginpahayag sini nga tuman subong ang iya nga pag-focus sa iya nga physical condition.
Tuyo sini nga makabalik sa hampang sa Laver Cup sa London halin sa September 23 tubtub sa 25 kag sunod amo ang iya nga hometown tournament sa Basel halin sa October 24-30.
Nahibaluan nga sa bug-os nga 2021, 13 lang ka kumpetisyon ang naintrahan ni Federer kag anum lang sa 2020.
Pang-50 siya subong sa current nga ATP standings, ang pinakanubo nga rank nga iya nga nakuha sa sulod sang 22 ka tuig sa iya nga tennis career.
