Nag-qualify para sa Paris Olympics subong nga tuig ang Filipino-Ivorian fencer nga si Maxine Esteban nga ginwigit anay sang Pilipinas sa national team apisar nga wala sang notice ukon pagpaathag nga ginhatag.
Sa maabot nga Olympiada, indi man Pilipinas kundi Ivory Coast ang itiglawas ni Esteban.
Nakuha sini ang Olympic ticket matapos ang 2024 Absolute Fencing Gear FIE Foil Grand Prix sa Washington, United States kun sa diin ang iya pwesto ang nagpabilin sa iya sa Olympic qualifying race para sa nasambit nga African continental zone.
Todo-pasalamat man ang 23-anyos nga anay Ateneo standout sa sini nga “second chance” nga ginhatag sa iya.
Makatalandog-balatyagon man ang pagdedikar sini sang kadalag-an sa duha ka pungsod — sa Ivory Coast nga amo ang nagbaton sa iya; kag sa Pilipinas nga una naghatag sang kalain sang buot sa iya apang padayon niya nga ginapalangga.
“This is for Cote d’Ivoire, the country that embraced me, believed in me and supported me all the way, and for the Philippines, the country my heart will always beat proud of,” pahayag sini.
Nangin kontrobersyal si Esteban sang nagligad nga tuig bangud sa pag-switch sini sang nationalities agud lagson ang iya handum nga makasaka sa Olympiada.
Walo ka tuig siya nga kabahin sang Philippine national fencing team apang masakit ang ending sang iya istorya sa Pilipinas.
Ginpakigbahin sini anay sang Nobyembre 2023 nga ginkakas siya sa national team kag “nabastos” gid siya bangud wala man lang sang pahibalo nga ginhatag antes ini nawigit.
“I did not give up on my country, I gave up on the federation because they gave up on me first. The reality is, sobra akong nabastos because I was removed from the national team roster without even being given the courtesy of a written nor a face-to-face notice and I was a member of the national team for eight years with good standing,” pahayag sini sang nagligad nga tuig.
Gin-report nga sang amo nga tion, naga-recover pa lang siya sa injury nga naangkon sini sa world championships rason nga nagsampaw-sampaw ang kalain sang iya buot.
Sang amo nga tion, nagprangka man si Esteban nga may double-standard sa federation sa Pilipinas ukon indi patas ang pagtratar sa ila. “Mayroon din mga hindi sumali na mga nasa national team pa rin hanggang ngayon. The law should apply to all, if not, then none at all.”
Ginsugid man sini anay nga makapila ka beses siya nga nagsulat sa federation agud magpangayo sang paathag kag naghingyo man nga makaatubangay sila para maathagan siya sang sitwasyon apang wala ginsabat ang iya request.#
