Ginpasundayag paagi sa Iloilo Festivals Homecoming Parade ang mga performances nga naghatag sang dungog sa syudad kag probinsya sang Iloilo sang Hunyo.
Ginhimo ang parada, Hulyo 12, halin sa Provincial Capitol tubtub sa Freedom Grandstand agud nga magpakita man sang pagpasalamat sa suporta sang mga Ilonggo sa national kag international stages.
Lakip sa nag-perform amo ang Dinagyang Tribes competition champion nga Tribu Paghidaet nga amo man ang nagtiglawas sa Pilipinas sa Philippine National Day Parade sa World Expo 2025 Osaka, Japan.
Nagpabilib man sa mga tumalan-aw ang Tribu Pan-ay nga first runner-up sa Festivals Performance Competition sa Parada ng Kalayaan 2025, amo man ang Tultugan Festival sang Maasin nga amo ang kampyon sa amo nga kategorya.
Nasaksihan man sa syudad ang katahum sang Cry of Sta. Barbara Float sang Sta. Barbara, Iloilo nga amo ang first runner-up sa Floats Competition sa amo man nga event sang tinalikdan nga bulan kadungan sang 127th Independence Day sang Pilipinas.
Sa iya mensahe, nagpalab-ot sang pagpanginbulahan si Iloilo Governor Arthur Defensor, Jr. sa tanan nga nagtiglawas sang syudad kag probinsya. Labaw diri suno sa iya, ginapasalamatan niya ang pagbuligay sang tanan nga nakilala pa ang Iloilo sa Pilipinas nga nagbilin man sang marka nga makabulig sa ekonomiya sang syudad kag probinsya.
Matandaan nga sang Hulyo 10, bangud sa sini nga performances, nakabaton man ang Iloilo officials ang pagpasidungog sa Kalayaan Hall sa Malacañang. Lakip sa nagkadto sa seremonya nga ginpangunahan ni President Ferdinand Marcos, Jr. kag First Lady Liza Marcos amo sanday Gov. Defensor, Vice Governor Lee Ann Debuqe, Maasin Mayor Francis Amboy, Santa Barbara Mayor Dennis Superficial kag Iloilo City Mayor Raisa Treñas.
