ILOILO CITY – Ipaidalom sa DNA test kag autopsy examination ang fetus nga nasapwan nga nagalutaw-lutaw sa irigasyon sa Barangay Agsalanan, Dingle, Iloilo.
Ini matapos ginkuhaan sang DNA sample ang iloy sang fetus nga ginapatihan may diperensiya sa panghuna-huna.
Sa interview sang Bombo Radyo Iloilo kay S/Insp. Samuel Vepenosa, hepe sang Dingle Municipal Police Station, ginpahayag sini nga nag-ako ang 39-anyos nga iloy sa ginhimo sini nga pagbilin sang iya anak sa irigasyon.
Nahibaluan nga ini na ang ika-tatlo nga anak sang nasambit nga iloy kag lain-lain ang amay sang iya mga bata.
Ang panganay sini ang naga-edad na sang 12-anyos samtang lima ka tuig naman ang ika-duha nga gintuyo man sini sadto nga i-flush sa inodoro apang ini ang nasalbar.
Nahibaluan nga ginpahog sang iya amay ang suspek nga indi na dapat masundan pa ang duha sini ka mga kabataan kag ini ang ginapatihan nga rason kun nga-a ginbilin sang iloy sa irigasyon ang iya anak.