ILOILO CITY- Emosyunal nga gindumdum sang fiancée sang medical personnel nga napatay bangud sa aksidente sa distrito sang Mandurriao ang mga matahum kag indi malimtan nga bahin sang ila relasyon sang nagakabuhi pa ang biktima partikular na ang natalana kuntani nila nga kasal sa maabot nga bulan sang Hunyo.
Sa exclusive interview sang Bombo Radyo kay Pearl Arroyo, fiance ni Henry Jun Jardio, iya ginpahayag nga nagkilalahay sila sang biktima sang may yara sang Unity Ride sadtong November 2017 bangud pareho sila nga miyembro sang motorcycle club.
Suno kay Arroyo, nakig-abyan sa iya si Jardio bangud gintandaan na siya nga daan sang biktima antes pa sila nagkilalahay kag ginkakibot man niya ang pagpalapit sini sa iya.
Mas nagbakod pa gid suno sa iya ang ila relasyon sang pareho sila nangin admin sang Panay Alliance of Riding Enthusiasts kag upod nila gin-organisa ang nagkalain-lain nga charity rides, safety training, kaupod sang nagkalain-lain nga motorcycle club sa Panay.
Matapos sang pila ka tuig wala na sang kun ano pa, nahisugtan nila nga duha nga magplano sang ila kasal bangud nabatyagan na nila nga tion na agud nga sila ang mag-isa.
Naka-amat-amat naman sila kuntani supot suno kay Arroyo bangud luyag ni Jardio nga imbitarun ang iya mga kaabyanan sa ila kasal, kag nahitso na kuntani ang seremonya sang kasal sa pastora sang ila simbahan.
Wala man siya sang may nadumduman nga tion suno sa iya nga nagbaisay sila sang biktima, bangud indi niya luyag nga may yara sang disgustuhanay sa tunga nila kag tuman ka mapinalanggaon kag ma-effort si Jardio sa ila relasyon.
Ginpakigbahin man ni Arroyo nga antes pa man natabo ang aksidente, Dominggo sang aga, ginsugo pa niya si Jardio nga magpadulong sa Forest Lake agud magdala sang pagkaon para sa ido nga nagutuman sa amo nga patyo, bangud kabahin sila sang isa ka grupo sa facebook nga ‘rescue and adopt Iloilo’ nga nagapangsalbar sang mga stray dogs and cats.
Pahayag pa niya, wala man siya naglaum nga sa forest lake man igalubong ang iya kahagugma.
Sa subong, halos nabudlayan pa siya magbatun sang natabo bangud kabudlay para sa iya nga nadulaan siya sang pinalangga sa kabuhi bangud sa aksidente.
Ginpasigurado naman sang natungdan nga magapadayun sila sa pagpakigbato agud mahatagan sang hustisya ang kamatayon ni Henry Jardio.
Nahibaluan nga napatay si Jardio matapos ginbungguan sang salakyan sang Indian National nga ginamaneho ni Harjinder Gil ang motorsiklo nga ginamaneho sini sa Pison Avenue, Brgy. San Rafael, Mandurriao, Iloilo City.
Mensahe ni Ma’am Pearl para sa pinalangga nga si Henry Jun
‘Lab i Know nga ara kagid sa Ginoo, and mahidlaw gid kami tanan sang grupo, tanan mo nga mga friends sa imo. You’re very much loved. I know the Lord loves you so much kag ara kana sa iya. good night and see you in the morning’
Mensahe ni Ma’am Pearl para kay Harjinder Gil
“Tani marealize mo nga kanugon gid snag kabuhi nga nadula. Indi to siya ordinaryo nga tawo kag damo-damo gid to ang na blessed because sang kabuhi niya”
We are going to pray and fight for justice”
