Nagbalik-ensayo na ang naturalized player sang Gilas Pilipinas nga si Justin Brownlee bilang preparasyon para sa FIBA Asia Cup nga pagahiwaton sa masunod nga bulan sa Jeddah, Saudi Arabia.
Malawig man ang nangin pahuway sang 37-anyos nga resident import pagkatapos nga magsuprer sini sang injury sa PBA Commissioner’s Cup finals sa tunga sang Barangay Ginebra kag TNT Tropang Giga.
Pagkatapos sang finals, nagpauli ini anay sa Amerika agud nga magpaidalom sa isa ka minor operation. Sa subong, maayo na ang kondisyon sang iya shooting hand.
Samtang yara sa US suno kay Gilas Pilipinas head coach Tim Cone, nagpadayon man si Brownlee sa pag-work out agud nga mapabilin nga maayo ang kondisyon sang iya lawas.
Nagsugod na sang Lunes ang training camp sang Gilas Pilipinas kun sa diin mas maka-focus naman si Cone matapos nga nalutos ang Ginebra sa San Miguel sa Game 7 sang best-of-seven semifinal series sang PBA Philippine Cup.
Luwas kay Brownlee, nag-abot na man sa Manila si AJ Edu nga isa man ka daku nga bulig sa team labi na nga wala sa lineup si Kai Sotto.
