Natapos man ang ginkabig ‘fairytale run’ sang Latvia subong nga FIBA World Cup 2023 apang indi na mapanas ang rekord sini sa tournament nga mahimo malabawan pa gid sa masunod nga mga edisyon sang hinampang.
Bilang debutant sa World Cup kag nagapang-29 sa FIBA rankings, yari ang halos indi mapatihan nga kadalag-an sang team:
*Naghimo sang upset paagi sa paglutos sa World no. 5 nga France sa Group stage
*Nagkibot sa bilog nga kalibutan matapos gintumba ang defending champions nga Spain sa second round
*Nakakuha sang ticket para sa quarterfinals matapos ginpierde ang World Number 13 nga Brazil sa round of 16
Sa quarterfinals, diutayan man nga maghuyhuy ang abaga sang undefeated team nga Germany bangud sa pwersa sang Latvians apang nagtakop ang hampang, 81-79, pabor sa Germans sa Mall of Asia Arena subong nga gab-i.
Mangin ang forward sang Germans nga si Johannes Thiemann ang nag-ako nga todo ang iya pangamuyo nga indi mapasulod sang seven-year NBA veteran nga si David Bertans ang tres sang manugtapos na ang match.
“I was praying. I was really praying that he (Bertans) misses that shot,” suno kay Thiemann nga naglaragway sang kampanya sang Latvia bilang “unbeliavable” subong nga tuig.
Nahibaluan nga ang Latvia man ang may pinaka-manubo nga rank sa walo ka mga teams nga nag-abanse sa final phase diri sa Pilipinas. #
See Translation
