Sulod na sa semifinals sang FIBA World Cup 2023 ang Germany matapos ginlutos ang debutant nga Latvia sa quarterfinal match sa Mall of Asia Arena sa Pasay City, 81-79.
Nanguna sa World No. 11 nga Germans ang Orlando Magic star nga si Franz Wagner nga nakatipon sang 16 puntos, walo ka rebounds, kag tatlo ka assists.
Ini ang labing-una nga tion sa sulod sang 21 ka tuig nga nakasulod sa semifinals ang Germany, apang mabakod man ang ila pagtindog subong nga tournament bangud sila na lamang ang naga-isahanon nga undefeated team.
Sunod sini nga atubangon ang Team USA sa Byernes, Septyembre 8. Ginakabig man ini nga mangin rematch sang duha ka teams matapos ginlutos sang Americans ang Germans sa exhibition game sa nagligad nga Agusto 21 sa Abu Dhabi sa pagpanguna ni Anthony Edwards.
Sa pihak nga bahin, apisar natapos na ang kampanya sang Latvia subong nga tuig, madamo ang nagdayaw sa kabakod sang team nga apisar debutants, naghimo sang upset paagi sa paglutos sa World No. 5 nga France sa Group Stage; ginpasagunsunan sang ginkabig pinakadaku nga upset subong nga World Cup paagi sa pagtumba sa defending champions nga Spain sa second round; kag pagpierde pa sa World No. 13 nga Brazil sa round of 16 nga nangin ticket sini sa pag-abanse sa quarterfinals. #
