Ginlutos sang Gilas Pilipinas ang Macau Black Bears, 103-98, sa send-off match sa Araneta Coliseum sa Cubao, Quezon City para sa 2025 FIBA Asia Cup.
Ginlagas sang national team ang 21-puntos nga abanse sang kasumpong agud madepensahan ang home court antes magbyahe para sa tournament sa Kingdom of Saudi Arabia.
Nanguna sa nationals ang naturalized player nga si Justin Brownlee nga may 32 points, 15 rebounds, kag five assists. Ini ang iya una nga hampang sa Pilipinas matapos ang pagpahuway bangud sa injury sa tudlo nga iya nakuha sa finals sa PBA Season 49 Commissioner’s Cup.
Nakadugang naman ang fan-favorite nga si Dwight Ramos sang 19 markers, six dimes, kag four boards, samtang si AJ Edu ang may yara sang 15 points. Sanday Kevin Quiambao kag Scottie Thompson naman nakaamot sang tag-14 kag 10 points.
Sa Huwebes magabyahe na ang team padulong sa Saudi, kag may isa pa ka friendly game batok sa Jordan sa Agusto 2 antes ang pormal nga pagbukas sang Asia Cup.
Sa Agusto 6, atubangon sini ang Chinese Taipei; New Zealand sa Agusto 7; kag Iraq sa Agusto 9.#
The scores:
Gilas Pilipinas 103 – Brownlee 32, Ramos 19, Edu 15, Quiambao 14, Thompson 10, Perez 7, Newsome 2, Abarrientos 2, Malonzo 2, Aguilar 0, Tamayo 0.
Macau Black Bears 98 – Douglas 23, Anthony 22, Leung 17, Peek 14, Shackelford 7, Millora-Brown 6, Dennis 5, Ndiaye 2, Obasa 2, Micek 0.
Quarterscores: 25-33; 46-63; 79-81; 103-98.
(Photo: Samahang Basketbol ng Pilipinas/FB)
