Wala na sang paglaum ang Gilas Pilipinas nga automatic nga maka-qualify sa 2024 Paris Olympics matapos ginlutos sang South Sudan sa classification round sang 2023 FIBA World Cup, 87-68.
Nagbubo si Jordan Clarkson sang 24 puntos kag tatlo ka assists nga ginbuligan sang 20 puntos kag 12 rebounds ni Dwight Ramos kag 12 puntos ni AJ Edu, apang indi ini bastante agud malutos ang kasumpong nga debutant lamang sa World Cup kag mas manubo pa sa FIBA ranking.
May 17 puntos ang Chicago Bulls guard nga si Carlik Jones nga amo ang nagpanguna sa iban pa nga South Sudanese; may 11 puntos kag 12 rebounds ang Los Angeles Lakers forward nga si Wenyen Gabriel; kag tatlo ka iban pa nga players sang amo nga nasyon ang nakalab-ot sa double-figure mark.
Ini na ang ikaapat nga sunod-sunod nga kalutusan sang Gilas sa amo nga tournament matapos man ini ginpierde sang Dominican Republic, Angola, kag Italy sa group phase.
Sa tanan nga Asian teams, ang Japan ang may pinakamataas nga tyansa nga makuha ang slot para sa 2024 Paris Olympics matapos ang duha na ka daog — isa sa group match batok sa Finland kag isa ka daog sa classification batok sa Venezuela.
Atubangon sang Gilas buwas sa gab-i ang national team sang China para sa katapusan nga hampang sa classification round. #
