ILOILO – Liwat nga nagpaandam ang Philippine Coast Guard sa mga nagabyahe sa baybayon matapos ginpaidalom sa Signal No. 1 ang Visayas bangud sa Bagyo Vicky.
Sa exclusive interview sang Bombo Radyo kay Commander Edison Diaz, spokesperson sang Philippine Coast Guard-Iloilo, iya ginpahayag nga kanselado subong nga adlaw ang byahe sang mga Roll On Roll Off (RORO) vessel kag fastcraft sa Bacolod-Iloilo kag vice versa.
Mangin ang mga magagmay nga pumpboat ukon iban pa nga sakayang pandagat sa Guimaras ang wala man ginapasugtan nga magbyahe agud indi na masulit pa ang Iloilo Strait tragedy.
Apang ang mga fiber glass nga pumpboat nga nagabyahe Buenavista, Guimaras -Iloilo City and vice versa kag Jordan, Guimaras and vice versa ang ginapasugtan nga magbyahe.
Ang mga Roll On Roll Off (RORO) vessel kag ang mga dalagko nga barko ang ginapasugtan man nga magbyahe sa Guimaras -Iloilo City and vice versa .
Nagpangabay man si Diaz sang paghangop kag kooperasyon sang publiko.
