Nagalaom si Iloilo City Mayor Jerry Treñas nga sa Mayo 1 amat-amat na nga magabukas ang mga establisimento sa syudad.
Sa interview sang Bombo Radyo kay Mayor Treñas, iya ginpahayag nga kun magkooperar ang tanan, magabukas ang pila ka mga mall sa syudad sa Mayo 1 apang obserbahan sa gihapon ang physical distancing kag pagsuksok sang face mask.
Suno kay Treñas, ang fiesta sa mga kabarangayan ang indi pa niya mapahanugutan nga magbalik, amo man ang mga eskwelahan kag religious ceremonies bangud pat-od nga indi ma obserba ang physical distancing.
Samtang bwas, Abril 18 maga umpisa na ang Weekend block off nga kabahin sang Expanded Enhanced Community Quarantine sa syudad sang Iloilo.
Liwat nga ginpahanumdom ni Mayor Treñas nga humalin 9:00 sa aga tubtob 3:00 sa hapon lang magabukas ang mga supermarkets ukon grocery stores.
Mga yara sa food production ang pahanugutan nga maka operate kaangay sang dressing plants, fishing port kag flour mill.
Sa pihak nga bahin, gin-ako ni Mayor Trenas nga indi bastante ang test kits nga may yara subong sa syudad sang Iloilo.
Apang nagapangita na sang Polymerase chain reaction (PCR) test kits ang alkalde bangud may yara na ini sang pondo halin sa national government.
Dugang pa sang alkalde, may yara sang container van loboratory nga ginalantaw ang syudad balor P15 million sa diin kumpleto na ini sa pasilidad.
Nagpabutyag man pahayag niya ang Department of Health 6 nga magabulig ini sa pag accredit sang container van laboratory kag sa mga medical personnel nga mahimo i-train.
Kun aprubahan sang Department of Health national office ang container van laboratory, ini ang pagabaklon sang Iloilo City Government.
Unahon nga i-test ang mga frontliners, katapo sang Public Safety and Transportation Management Office, Philippine National Police kag Media agud mapat-od kun bala mahimo na nga makabalik sa normal ang syudad sa Mayo 1.
