ILOILO CITY – Tinguhaan pa ni 5th district Representative Raul Tupas nga makadala sang mas madamo nga development sa distrito kadungan sang iya katapusan nga termino sa House of Representatives.
Sa interview sang Bombo Radyo kay Tupas, iya ginpahayag nga ginatinguhaan niya nga matigayon nga matigayon ang layi nga nagatukod sang programa para sa agri-fisheries nga sector.
Isa na ka hatchery ang pasado na kag temporaryo nga dumalahan sang Bureau of Fisheries and Aquatic Resources (BFAR) antes i-turn over sa Northern Iloilo University (NIU) para sa research kag agud nga makadala sang income.
Ang iban pa nga hatchery ang ginaduso nga ipahamtang sa banwa sang Carles, Concepcion kag Barotac Viejo.
Magluwas sina, iduso man sang kongresista ang pagtukod sang isa ka general hospital ukon tertiary hospital.
Sa 5th district, may yara sang tatlo ka mga ospital nga nahamtang sa banwa sang Balasan, Sara kag Barotac Viejo.
Ang general hospital ang indi lamang makabulig sa mga pumuluyo sang distrito kundi maka-boost man sang turismo.
Isa sa mga ginakonsiderar sang mga turista sa pagpadulong sa isa ka lugar amo ang tertiary hospital.
Iduso man sang kongresista ang posible nga pagpahamtang sang airport sa distrito nga makabulig para sa turismo kag pag-export sang agricultural products.
Nakahatag na sang sulat ang iya opisina sa Department of Transportation (DOTr) may kaangtanan sa ginaduso nga pagtukod sang community airport.
Dugang pa niya, iduso man ang pagpahamtang sang dugang pa nga eskwelahan sang Technical Education and Skills Development Authority (TESDA).
